「健」步行步 活在當下

葵涌醫院每年都會為病人、復元人士同照顧者舉辦活動，去年底更首次加入運動元素，舉辦北歐健步行。「病人好多時諗得太遠，容易影響情緒，所以我哋選擇咗新興運動『北歐健步行』，並命名為『健步行．步』，希望參加者可專注腳下每一步，好好享受生命當下，唔好過份憂慮，又配合到2025年精神健康月主題——『活．好D』。」葵涌醫院精神健康推廣委員會成員、精神科部門運作經理梁兆基（梁Sir）分享道。

梁Sir同團隊帶領約100位復元人士，分別漫步荔枝角公園、黃大仙文化公園、青衣公園及西貢蕉坑自然教育徑。註冊護士（精神科）楊茜茹提到，健步行可以幫助受部分精神科藥物影響體重嘅病人增肌減重，並刺激血清素分泌，減輕抑鬱同焦慮。「我哋特別加入遊戲元素，鼓勵較少出門嘅復元人士多啲同人互動，識多啲朋友，提升社交能力。」註冊護士（精神科）鄔進恩補充。

參加者若藍因病容易氣喘同手腳腫脹，好少約朋友外出。參加健步行之後，佢慢慢對運動萌生興趣，更願意踏出家門，到戶外呼吸新鮮空氣。活動亦令佢變得開朗，識到新朋友，情緒更加正面同穩定。

梁Sir同佢嘅團隊未來會繼續設計創意活動，與病人、復元人士同照顧者同行，支持佢哋重新融入社區。